Rev. Anjok Sanguth (L) nghilh loh nan:

Kum tam tak West Bengal Field a Kohhran hote hmangaih taka min lo enkawl sak thintu, kan Pastor duh em em Rev. Anjok Sanguth (8th March 1952- 14th Oct 2015) chuan 14th Oct 2015 khan chatuan ram min lo pan san ta. Vawiin hian ama puala inkhawmna hnuhnung ber (Antim Sewa) kan nei a, a lunglen thlak in kan va ui teh lul em. Vawin ama puala Programme hnuhnung ber kan hman avangin amah hriat reng nan he thu hi ka han post-duh a ni.

Rev. Anjok Sanguth hi Nepali niin Lepchah hnam (Sikkimese dik tak) a ni a, tunah hian Nepali Pastor bial min enkawl sak mektu a ni bawk. Kum 1983-1987 khan Eastern Theological College, Jorhat (Assam) ah BTh a zir zo a, 1989 ah Mrs Rekha nen inneiin fapa (Jonah) leh fanu (Juniruth) neiin chhungkaw nun hlim leh zangkhai tak an ni thin. West Bengal Field (BCM) ah Pro Pastor a tan kum 1992 lakluh niin 20th March 1994 khan ZBM Committee remtihnain Ordain-a ni. Tunah hian Baptist Church of North Bengal ah Executive Secretary ni mek lai a ni bawk. 

West Bengal Field a ka luh hnu (From 18th April 2013)hian Rev. Anjok nen hian rawngbawlna kawng hrang hrangah kan in kawp tam hle a. Pastor ka hriat tawh zingah pawh mi inngaitlawm leh kawm nuam ber te zing ami a ni. Mi nunnem tak leh mi rilru tih lungawiloh hlau tak mi a ni. Kan in hmelhriat tirh atanga a thihni thlengin a thinur hmel ka la hmu ngai miah lo. Mahni tana hma sial ngai lo leh mi thil phal tak a ni bawk. Hun liam tawhah kohhranin hun khirh leh harsa tak tak a paltlang lai pawh a Kohhran humhim tu a ni a, midang ten silai nen an vau a Kohhran chhuahsan tura an tih lai pawhin rinawm taka BCM Mission tana thawk thin, eng lai pawha Missionary te tan tlat a phatsan ngailotu a ni. Kan tan chuan channa nasa tak a ni a, kan ui tawp dawn lo a ni.